വെറുമൊരു വീഴ്ചയല്ല! തൊണ്ടിമുതൽ കേസിൽ ആൻറണി രാജുവിനും ജോസിനുമെതിരെ വിധിയിൽ ഗുരുതര പരാമർശങ്ങൾ

JANUARY 3, 2026, 9:21 AM

തിരുവനന്തപുരം: തൊണ്ടിമുതൽ അട്ടിമറിച്ച കേസിൽ പ്രതിയായ ആൻറണി രാജുവിനും കൂട്ടുപ്രതിയായ മുൻ ക്ലർക്ക് ജോസിനുമെതിരെ വിധിയിൽ ഗുരുതര പരാമർശങ്ങൾ.

കുറ്റകൃത്യം നടത്തിയവർ കോടതി ഉദ്യോഗസ്ഥനും അഭിഭാഷകനുമാണെന്നത് ഗൗരവമേറിയ കാര്യമാണെന്നാണ് കോടതി ഉത്തരവിൽ പറയുന്നത്. കുറ്റമാണെന്ന് അറിഞ്ഞുകൊണ്ടാണ് ആൻറണി രാജു തൊണ്ടി മുതൽ വാങ്ങിയത്.

കോടതി ഉത്തരവൊന്നുമില്ലാതെയാണ് ജോസ് തൊണ്ടി മുതൽ ആൻറണി രാജുവിന് കൈമാറിയത്. ഇതേക്കുറിച്ച് മൂന്നുമാസത്തോളം ജോസ് മിണ്ടിയില്ലെന്നും പിന്നീട് തൊണ്ടി മുതൽ പരിശോധിക്കാതെ തിരികെ വാങ്ങിയെന്നും ഇതാണ് ക്രമക്കേടിന് ഇടയാക്കിയതെന്നും കോടതി ഉത്തരവിൽ വ്യക്തമാക്കുന്നു.

നീതി നിർവഹണത്തിൻറെ അടിത്തറയെ തന്നെ തകർക്കുന്ന നടപടിയാണ് ഇരുവരുടേതെന്നും കോടതി ഉത്തരവിൽ പറയുന്നു. നിയമത്തെപ്പറ്റി വ്യക്തമായ ബോധമുള്ള ഇവർ‍ ചെയ്ത കുറ്റം നിസാരമായി കാണാൻ സാധിക്കില്ലെന്നും കോടതി ഉത്തരവിലുണ്ട്.

വെറുമൊരു വീഴ്ചയായി ഇതിനെ കാണാൻ കഴിയില്ല. തൊണ്ടി മുതൽ വാങ്ങാൻ ഒരു അധികാരവും ആന്റണി രാജുവിനില്ല. ഗൂഢാലോചനയക്കും തെളിവ് നശിപ്പിച്ചതിനുമടക്കം തെളിവുണ്ടെന്നും കോടതി ഉത്തരവിലുണ്ട്.