റോബിൻ വില്യംസിന്റെ സ്മരണാർത്ഥമുള്ള പുരസ്കാരം ബെൻ ആഫ്‌ളെക്കിനും മാറ്റ് ഡാമണിനും

APRIL 21, 2026, 10:01 PM

ഹോളിവുഡിലെ എക്കാലത്തെയും പ്രിയപ്പെട്ട കൂട്ടുകെട്ടായ ബെൻ ആഫ്‌ളെക്കും മാറ്റ് ഡാമണും വീണ്ടും വാർത്തകളിൽ നിറയുന്നു. തങ്ങളുടെ കരിയറിന് അടിത്തറപാകിയ അന്തരിച്ച ഇതിഹാസ താരം റോബിൻ വില്യംസിന്റെ സ്മരണാർത്ഥം ഏർപ്പെടുത്തിയ 'റോബിൻ വില്യംസ് ലെഗസി ഓഫ് ലാഫ്റ്റർ' (Robin Williams Legacy of Laughter Award) പുരസ്കാരത്തിന് അർഹരായിരിക്കുകയാണ് ഈ സുഹൃത്തുക്കൾ. ഇവരുടെ സിനിമാ ജീവിതത്തിൽ നിർണ്ണായക സ്വാധീനം ചെലുത്തിയ റോബിൻ വില്യംസുമായുള്ള ആത്മബന്ധത്തിനുള്ള ആദരവായാണ് ഈ അംഗീകാരം നൽകുന്നത്.

പ്രശസ്ത നടി ഗ്ലെൻ ക്ലോസ് സ്ഥാപിച്ച 'ബ്രിംഗ് ചേഞ്ച് ടു മൈൻഡ്' എന്ന സന്നദ്ധ സംഘടന സംഘടിപ്പിക്കുന്ന 'റെവൽസ് ആൻഡ് റെവലേഷൻസ്' ആഘോഷ പരിപാടിയിൽ വെച്ചാകും പുരസ്കാരം സമ്മാനിക്കുക.

ഏപ്രിൽ 27-ന് സാൻഫ്രാൻസിസ്കോയിലെ ഫോർട്ട് മാസൺ സെന്റർ ഫോർ ആർട്സ് ആൻഡ് കൾച്ചറിൽ വെച്ചാണ് ചടങ്ങ് നടക്കുന്നത്. റോബിൻ വില്യംസിന്റെ മക്കളായ സാക്ക്, സെൽഡ, കോഡി വില്യംസ് എന്നിവർ നേരിട്ടെത്തി പുരസ്കാരം കൈമാറുന്നു എന്ന പ്രത്യേകതയും ഈ ചടങ്ങിനുണ്ട്.

പുരസ്കാര നേട്ടത്തിൽ തങ്ങളുടെ പ്രിയപ്പെട്ട 'ചീഫിനെ' ഓർത്ത് ബെൻ ആഫ്‌ളെക്കും മാറ്റ് ഡാമണും വൈകാരികമായ പ്രതികരണമാണ് പങ്കുവെച്ചത്. "റോബിൻ ഞങ്ങൾ ആരാധിച്ചിരുന്ന ഒരാൾ മാത്രമല്ല, ഞങ്ങളുടെ സ്വപ്നങ്ങൾ യാഥാർത്ഥ്യമാക്കിയ വ്യക്തി കൂടിയാണ്. അദ്ദേഹം ഞങ്ങളുടെ സിനിമയോട് 'യെസ്' പറഞ്ഞതുകൊണ്ടാണ് അത് സംഭവിച്ചത്. അദ്ദേഹത്തിന്റെ പേരിൽ നൽകുന്ന ഈ പുരസ്കാരം ഞങ്ങൾക്ക് ഏറെ വിലപ്പെട്ടതാണ്," എന്ന് ഇരുവരും സംയുക്ത പ്രസ്താവനയിൽ പറഞ്ഞു.

1997-ൽ പുറത്തിറങ്ങിയ 'ഗുഡ് വിൽ ഹണ്ടിംഗ്' എന്ന ചിത്രത്തിലൂടെയാണ് ഇവർ മൂവരും ഒന്നിച്ചത്. ബെൻ ആഫ്‌ളെക്കും മാറ്റ് ഡാമണും ചേർന്ന് തിരക്കഥയെഴുതിയ ഈ ചിത്രം ഇവർക്ക് മികച്ച തിരക്കഥയ്ക്കുള്ള ഓസ്കാർ നേടിക്കൊടുത്തപ്പോൾ, ചിത്രത്തിലെ അഭിനയത്തിലൂടെ റോബിൻ വില്യംസ് മികച്ച സഹനടനുള്ള ഓസ്കാറും കരസ്ഥമാക്കി. ഷൂട്ടിംഗിന്റെ ആദ്യ ദിനം തങ്ങൾ എഴുതിയ വരികൾ റോബിൻ വില്യംസ് ക്യാമറയ്ക്ക് മുന്നിൽ അവതരിപ്പിക്കുന്നത് കണ്ട് വികാരാധീനരായ ഓർമ്മകൾ മാറ്റ് ഡാമൺ മുൻപ് പങ്കുവെച്ചിട്ടുണ്ട്.