ആഗോള സാമ്പത്തിക വ്യവസ്ഥയുടെ ചാലകശക്തിയായ അമേരിക്കന്‍ വിപണിയില്‍ ഇപ്പോള്‍ ദൃശ്യമാകുന്നത് അസാധാരണമായ അടിയൊഴുക്കുകളാണ്. ഒരു വശത്ത് പശ്ചിമേഷ്യന്‍ സംഘര്‍ഷങ്ങളുടെ പശ്ചാത്തലത്തില്‍ കുതിച്ചുയരുന്ന പണപ്പെരുപ്പം, മറുവശത്ത് ഒരൊറ്റ ദിവസം കൊണ്ട് വാള്‍സ്ട്രീറ്റില്‍ നിന്ന് 1.1 ട്രില്യണ്‍ ഡോളര്‍ തുടച്ചുനീക്കിയ വിപണി തകര്‍ച്ച. ഈ ഇരട്ടപ്രഹരം കേവലം ഓഹരി വിപണിയിലെ അക്കങ്ങളില്‍ ഒതുങ്ങുന്നതല്ല, മറിച്ച് അമേരിക്കന്‍ ജനതയുടെ നിത്യജീവിതത്തെയും രാജ്യത്തിന്റെ സാമ്പത്തിക ഭദ്രതയെയും ഇത് എങ്ങനെ ബാധിക്കുമെന്ന ആശങ്കയിലാണ് സാമ്പത്തിക വിദഗ്ദ്ധര്‍.

ഈ സങ്കീര്‍ണ്ണ പ്രതിസന്ധി അമേരിക്കയെയും ജനങ്ങളെയും എങ്ങനെയെല്ലാം ബാധിക്കുമെന്ന് പരിശോധിക്കാം:

സാധാരണക്കാരന്റെ ജീവിതച്ചെലവ് പരിധി വിടുന്നു

അമേരിക്കയിലെ പണപ്പെരുപ്പ നിരക്ക് 4.2 ശതമാനത്തിലേക്ക് ഉയര്‍ന്നത് ജനങ്ങളുടെ കുടുംബ ബജറ്റുകളെ താളംതെറ്റിച്ചു കഴിഞ്ഞു. ഇന്ധനം, ഭക്ഷണം, വൈദ്യുതി, ആരോഗ്യ സംരക്ഷണം തുടങ്ങിയ അവശ്യമേഖലകളിലെ വിലക്കയറ്റം സാധാരണക്കാരുടെ കൈപ്പിടിയില്‍ ഒതുങ്ങുന്നതിലും അപ്പുറമാണ്. നേവി ഫെഡറല്‍ ക്രെഡിറ്റ് യൂണിയന്‍ ചീഫ് ഇക്കണോമിസ്റ്റ് ഹെതര്‍ ലോംഗ് വ്യക്തമാക്കുന്നത് പോലെ, ഇതൊരു സാമ്പത്തിക ശാസ്ത്ര സിദ്ധാന്തമല്ല, മറിച്ച് ജനങ്ങള്‍ നിമിഷം പ്രതി അനുഭവിക്കുന്ന 'യഥാര്‍ത്ഥ പ്രതിസന്ധി'യാണ് എന്നാണ്. വരുമാനത്തിന്റെ വലിയൊരു പങ്ക് അടിസ്ഥാന ആവശ്യങ്ങള്‍ക്കായി മാറ്റിവെക്കേണ്ടി വരുന്നത് ജനങ്ങളുടെ ജീവിതനിലവാരത്തെ ദോഷകരമായി ബാധിക്കും.

'റിയല്‍ ഇന്‍കം' ഇടിയുന്നു; ജീവനക്കാര്‍ പ്രതിസന്ധിയില്‍

രാജ്യത്ത് പണപ്പെരുപ്പം ഉയരുമ്പോഴും അതിനനുസരിച്ച് വേതന വര്‍ധനവ് ഉണ്ടാകുന്നില്ല എന്നതാണ് ഏറ്റവും വലിയ തിരിച്ചടി. നിലവില്‍ ശമ്പള വര്‍ധനവ് 3.4 ശതമാനത്തില്‍ ഒതുങ്ങുമ്പോള്‍ പണപ്പെരുപ്പം 4.2 ശതമാനമായി തുടരുന്നു. അതായത് ശമ്പളം നേരിയ തോതില്‍ കൂടുന്നുണ്ടെന്ന് തോന്നുമെങ്കിലും വിപണിയിലെ വിലക്കയറ്റവുമായി തട്ടിച്ച് നോക്കുമ്പോള്‍ ജനങ്ങളുടെ യഥാര്‍ത്ഥ വാങ്ങല്‍ ശേഷി കുറയുകയാണ്. മെയ് മാസത്തിലെ കണക്കുകള്‍ പ്രകാരം പ്രതിവാര വരുമാനത്തില്‍ 0.2 ശതമാനത്തിന്റെ കുറവുണ്ടായി. കഴിഞ്ഞ വര്‍ഷവുമായി താരതമ്യം ചെയ്യുമ്പോള്‍ 0.7 ശതമാനത്തിന്റെ ഇടിവാണ് വരുമാനത്തില്‍ രേഖപ്പെടുത്തിയത്. ഇത് 2023 ഫെബ്രുവരിക്ക് ശേഷമുള്ള ഏറ്റവും വലിയ വാര്‍ഷിക വരുമാന തകര്‍ച്ചയാണ്.

ഇന്ധനവിലക്കയറ്റവും യാത്രാ ക്ലേശവും

ഇറാനെതിരെയുള്ള സൈനിക നീക്കങ്ങളും യു.എസ് പ്രസിഡന്റ് ഡൊണാള്‍ഡ് ട്രംപിന്റെ കടുത്ത പ്രസ്താവനകളും അന്താരാഷ്ട്ര വിപണിയില്‍ എണ്ണ വില കുതിച്ചുയരാന്‍ കാരണമായി. നിലവില്‍ യുദ്ധത്തിന് മുന്‍പുള്ള നിരക്കിനേക്കാള്‍ 40 ശതമാനം അധികമാണ് ഗ്യാസോലിന് അമേരിക്കക്കാര്‍ നല്‍കേണ്ടി വരുന്നത്. ഗതാഗതച്ചെലവ് വര്‍ധിക്കുന്നത് ചരക്കുകൂലി കൂട്ടുകയും അത് വിപണിയിലെ എല്ലാ നിത്യോപയോഗ സാധനങ്ങളുടെയും വില വീണ്ടും ഉയരാന്‍ ഇടയാക്കുകയും ചെയ്യും.

നിക്ഷേപങ്ങളും പെന്‍ഷന്‍ ഫണ്ടുകളും അപകടത്തില്‍

വാള്‍സ്ട്രീറ്റിലെ തകര്‍ച്ച വന്‍കിട സ്രാവുകളെ മാത്രമല്ല ബാധിക്കുന്നത്. അമേരിക്കയിലെ ദശലക്ഷക്കണക്കിന് വരുന്ന സാധാരണക്കാരുടെ 401(k) പോലുള്ള പെന്‍ഷന്‍ ഫണ്ടുകളും സമ്പാദ്യങ്ങളും ഓഹരി വിപണിയുമായി ബന്ധപ്പെട്ടാണ് കിടക്കുന്നത്. ജൂണ്‍ തുടക്കം മുതല്‍ വിപണിയില്‍ നിന്നുണ്ടായ 3.3 ട്രില്യണ്‍ ഡോളറിന്റെ മൂല്യച്ചോര്‍ച്ച സാധാരണക്കാരുടെ റിട്ടയര്‍മെന്റ് പ്ലാനുകളെയും ദീര്‍ഘകാല സമ്പാദ്യങ്ങളെയും വലിയ തോതില്‍ ബാധിക്കും. ഇത് ജനങ്ങള്‍ക്കിടയില്‍ ഭാവി സുരക്ഷിതത്വത്തെക്കുറിച്ചുള്ള വലിയ ഭീതിയാണ് സൃഷ്ടിക്കുന്നത്.

ഉയര്‍ന്ന പലിശനിരക്കുകള്‍ നീണ്ടുനില്‍ക്കും; ലോണുകള്‍ ഭാരമാകും

പണപ്പെരുപ്പം 4.2 ശതമാനത്തില്‍ തുടരുന്നതിനാല്‍, വിപണി നിയന്ത്രിക്കാന്‍ യുഎസ് ഫെഡറല്‍ റിവര്‍വ് പലിശനിരക്കുകള്‍ ഉയര്‍ന്ന നിലയില്‍ തന്നെ നിലനിര്‍ത്താന്‍ നിര്‍ബന്ധിതരാകും. ചിലപ്പോള്‍ ഈ വര്‍ഷാവസാനത്തോടെ വീണ്ടുമൊരു പലിശ വര്‍ധനവിനും സാധ്യതയുണ്ട്. പലിശ നിരക്ക് ഉയര്‍ന്ന് നില്‍ക്കുന്നത് ഭവന വായ്പകള്‍, കാര്‍ ലോണുകള്‍, ക്രെഡിറ്റ് കാര്‍ഡ് കുടിശ്ശികകള്‍ എന്നിവയുടെ പലിശ ഭാരം ഇരട്ടിയാക്കും. പുതിയ ബിസിനസ്സ് തുടങ്ങാനോ വീട് വാങ്ങാനോ ആഗ്രഹിക്കുന്നവര്‍ക്ക് ഇത് തിരിച്ചടിയാകും.

നികുതി നയം വരുത്തുന്ന അധിക ബാധ്യത

ചൈന, കാനഡ, യൂറോപ്യന്‍ യൂണിയന്‍ ഉള്‍പ്പെടെയുള്ള 60 രാജ്യങ്ങളില്‍ നിന്നുള്ള ഉല്‍പന്നങ്ങള്‍ക്ക് ട്രംപ് ഭരണകൂടം നിര്‍ദ്ദേശിച്ച 10 ശതമാനം ഇറക്കുമതി തീരുവ പ്രാബല്യത്തില്‍ വരാനിരിക്കുകയാണ്. ഇത് നടപ്പിലായാല്‍ വിദേശത്ത് നിന്ന് ഇറക്കുമതി ചെയ്യുന്ന വസ്ത്രങ്ങള്‍, ഗാര്‍ഹിക ഉപകരണങ്ങള്‍, ഇലക്ട്രോണിക്‌സ് എന്നിവയ്ക്ക് വില വീണ്ടും കൂടും. ഇത് പണപ്പെരുപ്പം കൂടുതല്‍ സങ്കീര്‍ണ്ണമാക്കുമെന്ന് സാമ്പത്തിക വിദഗ്ദ്ധനായ മൈക്കല്‍ ഫെറോലി മുന്നറിയിപ്പ് നല്‍കുന്നു.

ചുരുക്കത്തില്‍ മുകളില്‍ പറഞ്ഞ ഘടകങ്ങളെല്ലാം കൂട്ടിവായിക്കുമ്പോള്‍ അമേരിക്കന്‍ സമ്പദ്‌വ്യവസ്ഥ ഒരു വലിയ അനിശ്ചിതത്വത്തിലേക്കാണ് നീങ്ങുന്നത്. വിപണിയിലെ കറക്ഷന്‍ തുടരുകയും പണപ്പെരുപ്പം താഴേക്ക് വരാതിരിക്കുകയും ചെയ്താല്‍ രാജ്യം സാമ്പത്തിക മാന്ദ്യത്തിലേക്ക് നീങ്ങുമോ എന്ന ഭീതിയിലാണ് ഉപഭോക്താക്കളും നിക്ഷേപകരും. വരും മാസങ്ങളില്‍ ഫെഡറല്‍ റിസര്‍വ് എടുക്കുന്ന തീരുമാനങ്ങളും പശ്ചിമേഷ്യന്‍ രാഷ്ട്രീയ സാഹചര്യങ്ങളും മാത്രമായിരിക്കും ഈ പ്രതിസന്ധിയില്‍ അമേരിക്കയ്ക്ക് ആശ്വാസം നല്‍കുക.

ജിജി ജേക്കബ് 

English Summary

Amid escalating geopolitical tensions with Iran and a deepening AI-led tech rout that wiped $1.1 trillion off Wall Street in a single session, the US economy is facing severe strain as inflation surged to 4.2%, its highest level since early 2023. This mounting economic crisis is directly impacting everyday Americans as the sharp rise in essential costs—driven largely by soaring energy prices following US-Israel military actions—is heavily outstripping a stagnant wage growth of 3.4%, resulting in the sharpest decline in real annual income since February 2023. Consequently, citizens are grappling with the erosion of their long-term savings and pension funds amidst the market correction, escalating debt burdens from prolonged high Federal Reserve interest rates, and the looming threat of even higher consumer prices if the Trump administration's proposed 10% import tariffs on 60 nations take effect.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്