ഓപ്പറേഷൻ സിന്ദൂറിൽ തകർന്ന ആസ്ഥാനം വീണ്ടും പണിയാൻ ജെയ്ഷെ മുഹമ്മദ്; 11 കോടി ചെലവാക്കി സെൻട്രൽ ഹാൾ പുനർനിർമ്മിച്ചു, ഞെട്ടിക്കുന്ന റിപ്പോർട്ട്

AUGUST 21, 2026, 12:04 PM

ഇന്ത്യൻ സൈന്യം നടത്തിയ ഓപ്പറേഷൻ സിന്ദൂറിൽ തകർന്നടിഞ്ഞ തങ്ങളുടെ പ്രധാന താവളങ്ങൾ പുനർനിർമ്മിക്കാൻ ഭീകരസംഘടനയായ ജെയ്ഷെ മുഹമ്മദ് നീക്കം ശക്തമാക്കുന്നു. പാകിസ്ഥാനിലെ ബഹാവൽപൂരിലുള്ള തങ്ങളുടെ പ്രധാന ആസ്ഥാനത്തിന്റെ പുനർനിർമ്മാണത്തിനായി ഭീകരർ വൻ തുക ചെലവഴിച്ചതായാണ് പുതിയ രഹസ്യാന്വേഷണ റിപ്പോർട്ടുകൾ വ്യക്തമാക്കുന്നത്. ആസ്ഥാനത്തെ പ്രധാന സെൻട്രൽ ഹാളിന്റെ മാത്രം അറ്റകുറ്റപ്പണികൾക്കായി ഭീകരസംഘടന ഏകദേശം 11 കോടി രൂപയോളം ചെലവഴിച്ചതായാണ് പുറത്തുവരുന്ന വിവരങ്ങൾ.

ഭീകരതയ്‌ക്കെതിരെ ഇന്ത്യ നടത്തുന്ന ശക്തമായ പ്രതിരോധ നടപടികളുടെ ഭാഗമായാണ് ഓപ്പറേഷൻ സിന്ദൂർ എന്ന പേരിൽ അതിർത്തി കടന്നുള്ള കടുത്ത സൈനിക ആക്രമണം ഇന്ത്യ നടത്തിയത്. ഇന്ത്യൻ വ്യോമസേനയുടെയും സൈന്യത്തിന്റെയും കൃത്യതയാർന്ന ആക്രമണത്തിൽ ജെയ്ഷെ മുഹമ്മദിന്റെയും ലഷ്കറെ തൊയ്ബയുടെയും പ്രധാന കമാൻഡ് സെന്ററുകളും പരിശീലന ക്യാമ്പുകളും പൂർണ്ണമായി തകർന്നിരുന്നു. ഈ തിരിച്ചടിയിൽ നിന്ന് കരകയറാനാണ് ഭീകരസംഘടനകൾ ഇപ്പോൾ പാകിസ്ഥാൻ ഏജൻസികളുടെ സഹായത്തോടെ ശ്രമിക്കുന്നത്.

പാകിസ്ഥാൻ കേന്ദ്രീകരിച്ച് പ്രവർത്തിക്കുന്ന ജെയ്ഷെ മുഹമ്മദ് ഇതിനായി വൻതോതിൽ ക്രൗഡ് ഫണ്ടിംഗ് വഴിയും ഡിജിറ്റൽ വാലറ്റുകൾ വഴിയും പണം സമാഹരിക്കുന്നുണ്ട്. ഈസി പൈസ, സാദാ പേ തുടങ്ങിയ ഡിജിറ്റൽ സംവിധാനങ്ങൾ ഉപയോഗിച്ച് അന്താരാഷ്ട്ര തലത്തിൽ നിന്നും പണം സമാഹരിക്കാനാണ് ഭീകരർ ശ്രമിക്കുന്നത്. തകർക്കപ്പെട്ട പരിശീലന കേന്ദ്രങ്ങൾ വീണ്ടും സജ്ജമാക്കുകയാണ് ഇവരുടെ പ്രധാന ലക്ഷ്യം.

ഇന്ത്യൻ ആക്രമണത്തിൽ ത തകർന്ന മർക്കസ് സുബ്ഹാനല്ലാഹ് ഉൾപ്പെടെയുള്ള താവളങ്ങൾ പൂർവ്വസ്ഥിതിയിലാക്കാൻ പാകിസ്ഥാൻ ഗവൺമെന്റിന്റെയും ഇന്റലിജൻസ് ഏജൻസിയായ ഐഎസ്ഐയുടെയും രഹസ്യ പിന്തുണ ലഭിക്കുന്നുണ്ട്. വെള്ളപ്പൊക്ക ദുരിതാശ്വാസത്തിന്റെ പേരിലും വ്യാജ ചാരിറ്റികളുടെ പേരിലും സ്വീകരിക്കുന്ന തുക ഭീകരപ്രവർത്തനങ്ങൾക്കായി വകമാറ്റുകയാണ് ഇവർ ചെയ്യുന്നത്.

അതിർത്തി കടന്നുള്ള ആക്രമണ ഭീഷണി ഒഴിവാക്കാൻ തങ്ങളുടെ താവളങ്ങൾ പാകിസ്ഥാൻ അധിനിവേശ കാശ്മീരിൽ നിന്നും പാകിസ്ഥാന്റെ ഉൾപ്രദേശങ്ങളിലേക്ക് മാറ്റാനും ഇവർ ശ്രമിക്കുന്നുണ്ട്. ഖൈബർ പഖ്തുൻഖ്വ പോലുള്ള വിദൂര മേഖലകളിൽ പുതിയ സുരക്ഷിത താവളങ്ങൾ ഒരുക്കാനാണ് ഭീകരർ ആലോചിക്കുന്നത്. ഇതിനൊപ്പം തന്നെ ഇന്റർനെറ്റ് വഴിയുള്ള പ്രചാരണങ്ങളും റിക്രൂട്ട്‌മെന്റുകളും ഇവർ വീണ്ടും സജീവമാക്കിയിട്ടുണ്ട്.

സാമ്പത്തിക പ്രതിസന്ധി നേരിടുമ്പോഴും ഭീകരവാദ സൗകര്യങ്ങൾ പുനഃസ്ഥാപിക്കാൻ പാകിസ്ഥാൻ ഭരണകൂടം നൽകുന്ന പിന്തുണ അന്താരാഷ്ട്ര തലത്തിൽ വലിയ പ്രതിഷേധത്തിന് ഇടയാക്കിയിട്ടുണ്ട്. ഭീകരവാദത്തിന് സാമ്പത്തിക സഹായം നൽകുന്നത് തടയാൻ രൂപീകരിച്ച എഫ്എടിഎഫ് സംവിധാനങ്ങളുടെ നിരീക്ഷണങ്ങൾ മറികടന്നാണ് ഈ നിയമവിരുദ്ധ പണമിടപാടുകൾ നടക്കുന്നത്.

ഇന്ത്യൻ സുരക്ഷാ സേനയും ഇന്റലിജൻസ് വിഭാഗങ്ങളും പാകിസ്ഥാന്റെയും ഭീകരസംഘടനകളുടെയും ഈ നീക്കങ്ങളെ അതീവ ജാഗ്രതയോടെയാണ് വീക്ഷിക്കുന്നത്. തകർക്കപ്പെട്ട കേന്ദ്രങ്ങൾ വീണ്ടും പ്രവർത്തനസജ്ജമായാൽ അതിർത്തിയിൽ സുരക്ഷാ ഭീഷണി വർദ്ധിക്കുമെന്ന കണക്കുകൂട്ടലിൽ മുൻകരുതൽ നടപടികൾ ഊർജ്ജിതമാക്കിയിട്ടുണ്ട്.

പാകിസ്ഥാന്റെ ഭീകരവിരുദ്ധ വാദങ്ങൾ വെറും കപടമാണെന്ന് തെളിയിക്കുന്നതാണ് ഈ പുനർനിർമ്മാണ പ്രവർത്തനങ്ങൾ. വരും ദിവസങ്ങളിൽ ഇന്ത്യ അന്താരാഷ്ട്ര വേദിയിൽ ഈ വിഷയങ്ങൾ വീണ്ടും ഉന്നയിക്കാൻ സാധ്യതയുണ്ട്. അതിർത്തി കടന്നുള്ള ഭീകരവാദത്തിനെതിരെ വിട്ടുവീഴ്ചയില്ലാത്ത നിലപാടാണ് ഇന്ത്യ തുടർന്നും സ്വീകരിക്കുന്നത്.

English Summary: Jaish e Mohammed is rebuilding its terror headquarters in Bahawalpur Pakistan which was destroyed during Indias Operation Sindoor spending nearly Rs 11 crore on repairing the central hall with covert support from Pakistani agencies.