'ട്രെൻഡുകൾക്ക് പിന്നാലെയുള്ള ഓട്ടം മടുത്തു, സോഷ്യൽ മീഡിയ ആപ്പുകൾ നീക്കം ചെയ്തു'; ഡിജിറ്റൽ ഡിറ്റോക്സിനെക്കുറിച്ച് തപ്സി പന്നു

JUNE 5, 2026, 9:26 AM

ഇന്നത്തെ കാലത്ത് സിനിമാ പ്രമോഷനുകളും പൊതുപരിപാടികളും പോലെ തന്നെ സെലിബ്രിറ്റികളുടെ ജീവിതത്തിന്റെ ഒരു പ്രധാന ഭാഗമാണ് സോഷ്യൽ മീഡിയയും. എന്നാൽ, ഈ നിരന്തരമായ ഓൺലൈൻ ഓട്ടപ്പാച്ചിലുകളിൽ നിന്ന് മാറി സ്വന്തം ജീവിതത്തിലേക്ക് ശ്രദ്ധ കേന്ദ്രീകരിക്കാൻ തീരുമാനിച്ചിരിക്കുകയാണ് നടി തപ്സി പന്നു. ഏകദേശം ഒരു വർഷത്തോളം സോഷ്യൽ മീഡിയയിൽ നിന്ന് പൂർണ്ണമായി അകലം പാലിച്ച താരം, ഇപ്പോൾ ഡിജിറ്റൽ പ്ലാറ്റ്‌ഫോമുകളിലേക്ക് തിരിച്ചെത്തിയിരിക്കുകയാണ്. എന്നാൽ ഒരു സെലിബ്രിറ്റിയിൽ നിന്ന് സോഷ്യൽ മീഡിയ പ്രതീക്ഷിക്കുന്ന കാര്യങ്ങളെക്കുറിച്ച് സമ്മിശ്ര വികാരമാണ് താരത്തിനുള്ളത്.

തന്റെ ഫോളോവേഴ്‌സിനോട് ഇനി എങ്ങനെയുള്ള ഉള്ളടക്കങ്ങളാണ് തന്നിൽ നിന്ന് പ്രതീക്ഷിക്കുന്നത് എന്ന് ചോദിച്ചുകൊണ്ടാണ് തപ്സി ഡിജിറ്റൽ ലോകത്തേക്ക് മടങ്ങിയെത്തിയത്. കഴിഞ്ഞ വർഷം സോഷ്യൽ മീഡിയയിൽ നിന്ന് വിട്ടുനിൽക്കാൻ താൻ എടുത്ത തീരുമാനം പൂർണ്ണമായും വ്യക്തിപരമായ കാരണങ്ങളാലായിരുന്നുവെന്ന് അഭിമുഖത്തിൽ തപ്സി വെളിപ്പെടുത്തി:

"ഞാൻ സോഷ്യൽ മീഡിയ കുറയ്ക്കാൻ പോകുകയാണെന്ന് ഒരിടത്തും പ്രഖ്യാപിച്ചിരുന്നില്ല. എന്റെ ജോലികളിൽ നിന്ന് വ്യത്യസ്തമായി, എനിക്കായി മാത്രം ഞാൻ ചെയ്ത ഒരു കാര്യമായിരുന്നു ഇത്. ഈ സോഷ്യൽ മീഡിയ ഡിറ്റോക്സിന് പിന്നിൽ പല കാരണങ്ങളുണ്ട്. എപ്പോഴും പുതിയ ട്രെൻഡുകൾ തുടങ്ങുന്നതിന്റേയോ അല്ലെങ്കിൽ നിലവിലുള്ള ട്രെൻഡുകളുടെ ഭാഗമാകുന്നതിന്റേയോ ഒരു മത്സരപ്പാച്ചിലിലാണ് നമ്മളെന്ന് എനിക്ക് തോന്നി. അത് ശരിക്കും എന്നെ ശാരീരികമായും മാനസികമായും തളർത്തി. എനിക്ക് നിരന്തരം സോഷ്യൽ മീഡിയ നോക്കാതെ എന്റെ യഥാർത്ഥ ജീവിതം ആസ്വദിക്കണമായിരുന്നു."

ഈ പിന്മാറ്റം എളുപ്പമാക്കുന്നതിനായി താരം തന്റെ മൊബൈൽ ഫോണിൽ നിന്ന് സോഷ്യൽ മീഡിയ ആപ്ലിക്കേഷനുകൾ പൂർണ്ണമായും നീക്കം ചെയ്തിരുന്നു. പിന്നീട് മൂന്ന് ദിവസത്തിലൊരിക്കലോ മറ്റോ ഐപാഡ് വഴി മാത്രമാണ് അക്കൗണ്ടുകൾ പരിശോധിച്ചിരുന്നത്.

"ഞാൻ യഥാർത്ഥ ജീവിതം ആസ്വദിക്കാൻ തുടങ്ങി, അതൊരു ലഹരിയായി മാറി. നടീനടന്മാർ തങ്ങളെത്തന്നെ സോഷ്യൽ മീഡിയയിൽ അമിതമായി തുറന്നുകാട്ടരുത് എന്ന് പറയാറുണ്ട്. എങ്കിൽ മാത്രമല്ലേ ആളുകൾ തിയേറ്ററുകളിൽ വന്ന് സിനിമ കാണൂ? ആ യുക്തി എനിക്ക് ശരിയാണെന്ന് തോന്നി," തപ്സി പറയുന്നു.

സോഷ്യൽ മീഡിയയിൽ കാണാതായതോടെ 'നിനക്ക് സുഖമാണോ', 'നീ എവിടെയാണ് അപ്രത്യക്ഷയായത്' എന്നിങ്ങനെയുള്ള ചോദ്യങ്ങളുമായി നിരവധി പേർ എത്തിയതായും, തന്റെ പ്രൊഫൈൽ സിനിമകളെയും ബ്രാൻഡുകളെയും കുറിച്ച് മാത്രമുള്ളതായി മാറിയെന്ന് പലരും പരാതിപ്പെട്ടതായും തപ്സി ഓർക്കുന്നു.

സോഷ്യൽ മീഡിയയിൽ നിന്ന് വിട്ടുനിന്നത് തന്റെ പ്രൊഫഷണൽ ജീവിതത്തെ ബാധിച്ചതായും തപ്സി തുറന്നുപറഞ്ഞു. ഓൺലൈനിൽ എപ്പോഴും സജീവമായിരിക്കുന്ന സെലിബ്രിറ്റികളെയാണ് ബ്രാൻഡുകൾക്ക് കൂടുതൽ താല്പര്യമെന്ന് പലരും തന്നോട് പറഞ്ഞിരുന്നു.

"നീ കൂടുതൽ പോസ്റ്റുകൾ ഇടാത്തതുകൊണ്ട് ഈ ബ്രാൻഡ് നിന്നു മാറിപ്പോകും, അവർക്ക് എപ്പോഴും സോഷ്യൽ മീഡിയയിൽ ഹൈപ്പർ ആക്ടീവ് ആയിരിക്കുന്ന ആളെയാണ് വേണ്ടത് എന്നൊക്കെ പലരും എന്നോട് പറഞ്ഞു. മറ്റൊരു താരത്തെപ്പോലെ ആകാൻ എന്നെ ഉപദേശിച്ചു. നടീനടന്മാരുടെ പ്രധാന വരുമാന മാർഗ്ഗം ബ്രാൻഡുകളാണ്, അവർക്ക് പരസ്യം വേണം. നമ്മുടെ സോഷ്യൽ മീഡിയ പേജുകൾ അവരുടെ മാർക്കറ്റിംഗ് ടൂളുകളാണ് എന്ന കാര്യം എനിക്കറിയാം."

എങ്കിലും, ഒരു മാർക്കറ്റിംഗ് ടെംപ്ലേറ്റിന് അനുസരിച്ച് നടീനടന്മാർ തങ്ങളുടെ സ്വഭാവം മാറ്റേണ്ടതുണ്ടോ എന്ന് തപ്സി ചോദ്യം ചെയ്യുന്നു. ഒരു ബ്രാൻഡ് തന്നെ സമീപിക്കുന്നത് തന്റെ വ്യക്തിത്വം കണ്ടിട്ടാണെന്നും, മറ്റൊരാളെപ്പോലെ അഭിനയിക്കേണ്ടി വരികയാണെങ്കിൽ അതിൽ എന്ത് അർത്ഥമാണുള്ളതെന്നും താരം ചോദിക്കുന്നു. സോഷ്യൽ മീഡിയ വിനോദ വ്യവസായത്തിൽ ഒരു പ്രധാന ആയുധമാണെങ്കിലും, അത് ഒരാളുടെ യഥാർത്ഥ സ്വത്വം നഷ്ടപ്പെടുത്തിക്കൊണ്ടാകരുത് എന്നാണ് തപ്സിയുടെ നിലപാട്.