കടലിന്റെ അടിത്തട്ടില്‍ 50 ലക്ഷം വര്‍ഷം പഴക്കമുള്ള തിമിംഗല ശ്മശാനം; അമ്പരപ്പോടെ ശാസ്ത്രലോകം!

JUNE 10, 2026, 8:14 PM

ന്യൂയോര്‍ക്ക്: ശാസ്ത്രലോകത്തെ ഒന്നടങ്കം ആവേശത്തിലാഴ്ത്തിക്കൊണ്ട് തെക്കുകിഴക്കന്‍ ഇന്ത്യന്‍ മഹാസമുദ്രത്തില്‍ കൂറ്റന്‍ തിമിംഗല ശ്മശാനം (Whale Graveyard) കണ്ടെത്തി. ഏകദേശം 1,200 കിലോമീറ്ററോളം (745 മൈല്‍) നീളത്തില്‍ പരന്നുകിടക്കുന്ന ഈ അപൂര്‍വ പ്രദേശം സമുദ്രോപരിതലത്തില്‍ നിന്ന് 7 കിലോമീറ്റര്‍ താഴ്ചയിലാണ് സ്ഥിതി ചെയ്യുന്നത്. ഡയമന്റീന ഫ്രാക്ചര്‍ സോണ്‍ എന്നറിയപ്പെടുന്ന കടലിനടിയിലെ മലനിരകളും കിടങ്ങുകളും നിറഞ്ഞ ഭാഗത്താണ് ഈ വിസ്മയ കണ്ടെത്തല്‍.

പ്രശസ്ത ശാസ്ത്ര മാസികയായ നേച്ചര്‍ പുറത്തുവിട്ട റിപ്പോര്‍ട്ടിലാണ് ഈ വിവരങ്ങള്‍ ഉള്ളത്. ചൈന, ഇറ്റലി, ന്യൂസിലാന്‍ഡ് എന്നിവിടങ്ങളില്‍ നിന്നുള്ള ഗവേഷകരുടെ സംയുക്ത സംഘമാണ് കടലിനടിയിലെ ഈ വന്‍ നഗരം കണ്ടെത്തിയത്. ഇവിടെയുള്ള തിമിംഗല അവശിഷ്ടങ്ങള്‍ക്ക് 53 ലക്ഷം വര്‍ഷം വരെ പഴക്കമുണ്ട് എന്നതാണ് ഗവേഷകരെ ഏറ്റവും കൂടുതല്‍ അദ്ഭുതപ്പെടുത്തുന്നത്. ഇത്രയും വലിയൊരു തിമിംഗല ശ്മശാനം കണ്ടെത്തുമെന്ന് തങ്ങള്‍ സ്വപ്നത്തില്‍ പോലും വിചാരിച്ചിരുന്നില്ലെന്ന് ഗവേഷണ സംഘത്തിലെ അംഗവും ചൈനീസ് അക്കാദമി ഓഫ് സയന്‍സസിലെ ശാസ്ത്രജ്ഞനുമായ സിയാവോടോങ് പെങ് പറഞ്ഞു.

കടലിന്റെ ആഴങ്ങളിലേക്ക് നടത്തിയ 32 ഡൈവിംഗുകളില്‍ നിന്നായി ശാസ്ത്രജ്ഞര്‍ 485 ലധികം തിമിംഗല ഫോസിലുകളുടെയും സജീവമായ തിമിംഗല അസ്ഥികൂടങ്ങളുടെയും സാമ്പിളുകള്‍ ശേഖരിച്ചു. ഇതില്‍ വംശനാശം സംഭവിച്ച ഒരു അപൂര്‍വ തിമിംഗലത്തിന്റെ തലയോട്ടിയും ഉള്‍പ്പെടുന്നു. ഇതുവരെ ശാസ്ത്ര ലോകം കാണാത്ത പല പുതിയ ജീവികളും സസ്യങ്ങളും ഈ പ്രദേശത്തുണ്ടെന്നാണ് നിഗമനം. 53 ലക്ഷം വര്‍ഷം പഴക്കമുള്ള 'പ്‌റ്റെറോസെറ്റസ് ബെന്‍ഗ്വേലേ' (Pterocetus diamantinae) എന്ന വംശനാശം സംഭവിച്ച തിമിംഗലത്തിന്റെ ഫോസില്‍ തലയോട്ടി ഇവിടെ നിന്ന് കണ്ടെത്തി. കണ്ടെത്തിയ സ്ഥലത്തിന്റെ ഓര്‍മ്മയ്ക്കായി 'പ്‌റ്റെറോസെറ്റസ് ഡയമന്റീനേ' എന്ന് പേരിട്ടിരിക്കുന്ന പുതിയൊരു തിമിംഗല ഇനത്തെയും സംഘം തിരിച്ചറിഞ്ഞിട്ടുണ്ട്. അഞ്ച് മീറ്ററോളം നീളമുള്ള അന്റാര്‍ട്ടിക് മിന്‍കെ തിമിംഗലത്തിന്റെ അസ്ഥികൂടമാണ് കൂട്ടത്തില്‍ ഏറ്റവും വലുത്.

ജീവന്റെ പുതിയ സങ്കേതം

തിമിംഗലങ്ങളുടെ ഈ വമ്പന്‍ ശ്മശാനം ഇന്ന് ലക്ഷക്കണക്കിന് മറ്റ് ജീവികളുടെ താവളമാണ്. ജെല്ലിഫിഷുകള്‍, വിവിധതരം പുഴുക്കള്‍, ക്രസ്റ്റേഷ്യനുകള്‍ (ഞണ്ട്, ചെമ്മീന്‍ എന്നിവ ഉള്‍പ്പെടുന്ന ജീവിവര്‍ഗങ്ങള്‍) തുടങ്ങിയ വലിയൊരു ജീവിസമൂഹം ഈ അഴുകുന്ന ശരീരങ്ങളെ ആശ്രയിച്ച് ഇവിടെ ജീവിക്കുന്നുണ്ട്.

'ഒരു സൂപ്പര്‍ഹിറ്റ് സിനിമയുടെ ഒന്നാം ഭാഗത്തിന്റെ ട്രെയിലര്‍ കണ്ടതുപോലെയാണ് എനിക്ക് തോന്നിയത്. വരും ദിവസങ്ങളില്‍ ഇതിലും വലിയ അത്ഭുതങ്ങള്‍ ഈ കടലാഴങ്ങളില്‍ നിന്ന് പുറത്തുവരാനുണ്ട്.'എന്നായിരുന്നു കാലിഫോര്‍ണിയയിലെ കാല്‍വര്‍ട്ട് മറൈന്‍ മ്യൂസിയത്തിലെ സ്റ്റീഫന്‍ ജെ ഗോഡ്‌ഫ്രെ ഈ കണ്ടെത്തലിനെ വിശേഷിപ്പിച്ചത്.

ദുര്‍ഘടമായ ഭൂപ്രകൃതി കാരണം ഇവിടേക്ക് എത്തിപ്പെടുക എളുപ്പമല്ലെങ്കിലും, വരും കാലങ്ങളില്‍ കൂടുതല്‍ സമുദ്ര ഗവേഷണങ്ങള്‍ക്ക് ഈ പ്രദേശം വഴിയൊരുക്കുമെന്ന് ഉറപ്പാണ്.